Переводчик
Напярэдадні Дня Канстытуцыі юныя бабруйчане сталі паўнапраўнымі грамадзянамі краіны, атрымаўшы пашпарты. Урачыстая цырымонія ўручэння адбылася ў рамках Усебеларускай акцыі «Мы - грамадзяне Беларусі!». 14 сакавіка юнакі і дзяўчаты, іх бацькі і ганаровыя госці прынялі ўдзел у святочным гарадскім мерапрыемстве, якое прайшло ў Бабруйскім мастацкім музеі.
Ва ўрачыстай абстаноўцы атрымаць галоўны дакумент грамадзяніна ўдастоіліся 26 навучэнцаў, якія праславіліся ў вучобе, спорце, грамадскай дзейнасці. Атрыманне пашпарта - першы крок у дарослае жыццё, калі малады чалавек усведамляе свае правы і абавязкі.
Уручаючы важны дакумент, ганаровыя госці - старшыня Бабруйскага гарадскога Савета дэпутатаў Ірына Рынейская і намеснік старшыні гарвыканкама Уладзімір Кніга - нагадалі рабятам, што цяпер і яны бяруць на сябе часцінку адказнасці за сваю краіну. Моладзі пажадалі пацвярджаць званне дастойнага грамадзяніна Рэспублікі Беларусь добрымі справамі і ўчынкамі, услаўляць Радзіму і ганарыцца яе гістарычнай спадчынай, багаццем культуры і дасягненнямі беларускага народа, паважаць законы і берагчы традыцыі.
- У мінулым годзе мы адзначылі 30-годдзе з дня прыняцця першай Канстытуцыі нашай незалежнай, суверэннай Беларусі. Гэта асноўны дакумент, які вызначае нашы правы і свабоды, дае нам упэўненасць у заўтрашнім дні квітнеючай Беларусі. Дакумент, які з'яўляецца гарантам нашай будучыні. Віншую вас з дзяржаўным святам - Днём Канстытуцыі, - сказала Ірына Мікалаеўна і звярнулася са словамі на дарогу да маладых грамадзян. – Для кожнага з вас дзень атрымання галоўнага дакумента – пашпарта грамадзяніна Рэспублікі Беларусь – вельмі важны і ўнікальны. Ён азначае пачатак дарослага жыцця, атрыманне правоў і ў той жа час адказнасць перад нашай любімай Беларуссю, дачыненне да будучыні нашай краіны. Вы ўжо дасягнулі шмат чаго, але самыя вялікія вашы перамогі яшчэ наперадзе. Няхай гэтыя перамогі будуць на карысць нашай роднай краіны! Жадаю вам быць адказнымі, мэтанакіраванымі, сапраўднымі патрыётамі Беларусі, любіць свой горад і сваю краіну, рабіць усё магчымае, каб Беларусь заставалася такой жа прыгожай, мірнай і цудоўнай.
Цырымонія ўручэння пашпартоў стала хвалюючай і запамінальнай для дзяцей. Яны разумеюць, што перайшлі на новы этап жыцця, больш сур'ёзны і самастойны.
Кіра Брокар, навучэнка СШ №28:
«Хачу падзякаваць ад усіх рабят за сённяшняе свята, за ўвагу і высокі давер. Быць грамадзянінам Рэспублікі Беларусь – гэта вялікі гонар перад грамадствам і перад самім сабой. Ад нашага пакалення залежыць будучыня краіны. Мы абяцаем сваёй працай, справамі, вучобай умацоўваць добрае імя любімага краю, захоўваць памяць аб людзях, якія аддалі жыцці за незалежнасць Беларусі. Дзякуй усім, хто ў нас верыць!»
Ангеліна Ляноўская, СШ №24:
«Сённяшні дзень мне вельмі спадабаўся. Калі атрымлівала пашпарт, адчувала, быццам бы пасталела і перасягнула на новую прыступку свайго жыцця. Было цёплае адчуванне ад свята і вельмі прыемна пачуць добрыя словы ад ганаровых гасцей, якія ўручалі нам галоўны дакумент. Вельмі рада, што атрымала пашпарт у такой урачыстай абстаноўцы».
Ягор Баяршчонак, СШ №35 ім. П.І. Батава:
«Прыемна атрымаць пашпарт у святочнай атмасферы перад Днём Канстытуцыі, адчуваю сябе паўнацэнным грамадзянінам Рэспублікі Беларусь. Яркія эмоцыі, цеплыня і радасна на душы. Галоўны дакумент першым пакажу сваім бацькам».
Ігнат Рак, СШ №9:
«Я ўдзельнічаў у шматлікіх алімпіядах і спартыўных спаборніцтвах, мусіць, таму сёння мяне запрасілі на цырымонію. Атрыманне пашпарта - адна з найважнейшых падзей у маім жыцці. Трохі хваляваўся ў такі значны дзень. Пасля ўручэння пашпарта адчуў гонар ад таго, што я зараз сапраўдны паўнапраўны грамадзянін сваёй краіны».
Маргарыта Бушуева, фота Аляксея Слабко, www.bobrlife.by