Переводчик
Вынікі сацыяльна-эканамічнага развіцця за 2024 год - адно з галоўных пытанняў, разгледжаных на 10-й чарговай сесіі Бабруйскага гарадскога Савета дэпутатаў. Асноўныя акцэнты ў рабоце ўсіх сфер нашага горада агучыла намеснік старшыні гарвыканкама Вольга Махначова.
Ключавыя напрамкі дзейнасці - павышэнне эфектыўнасці работы рэальнага сектара эканомікі, пашырэнне знешнеэканамічных сувязей, развіццё медыцыны, культуры, спорту, адукацыі, падтрыманне законнасці і правапарадку. У мінулым годзе ў Бабруйску рэалізоўваліся больш за 70 мерапрыемстваў, устаноўленых праграмай сацыяльна-эканамічнага развіцця на пяцігодку. Забяспечаны прагноз па росце заработнай платы, прыцягненню інвестыцый у асноўны капітал, паступленню сукупных даходаў у бюджэт горада, уводу ў эксплуатацыю агульнай плошчы жылых дамоў і зніжэнню ўзроўню затрат на вытворчасць і рэалізацыю прадукцыі.
Узрасла выручка, значна скарацілася колькасць стратных прадпрыемстваў, актыўна абнаўлялася абсталяванне на вытворчасцях. У бабруйскіх арганізацыях рэалізоўваліся каля 25 маштабных праектаў і інвестыцыйных мерапрыемстваў на суму больш за 140 млн рублёў. У гэтым годзе працягнецца рэалізацыя інвестпраектаў на «Белшыне», заводзе ТДіА, мясакамбінаце, Бабруйскаграмашы, «Чырвоным харчавіку», ТАіМе, заводзе біятэхналогій.
«На 2025 год мы ставім комплексную задачу - забяспечыць прыцягненне інвестыцый на суму каля 550 млн рублёў. Асноўны іх аб'ём запланаваны ў прамысловасці, будаўніцтве жылля, стварэнні камфортнай гарадской інфраструктуры», - адзначыла Вольга Махначова.
У 2024-м быў асвоены выпуск па 63 таварных пазіцыях імпартазамяшчальнай прадукцыі, каля 30 працэнтаў якой пастаўлена на экспарт. Бабруйск захаваў прысутнасць на традыцыйных рынках збыту, працягнуў нарошчваць пастаўкі на рынкі дружалюбных краін. Значна павялічаны экспарт у краіны Афрыкі (рост у 3,2 раза).
Многае зроблена па добраўпарадкаванні горада, і гэтыя пераўтварэнні бачныя кожнаму жыхару. Дзеці пайшлі ў новы дзіцячы сад у Кісялевічах, уладкоўваліся дзіцячыя пляцоўкі, прыкметна абнавіліся тратуары і дарогі, сем'і атрымлівалі ключы ад кватэр у новабудоўлях, працягвалася абсталяванне ўстаноў аховы здароўя, адукацыі…
Бабруйчане сваёй працай стваралі ўтульнае асяроддзе для камфортнага жыцця, ганарыліся поспехамі і перамогамі ў алімпіядах, творчых конкурсах, спартыўных спаборніцтвах, прымалі гасцей з розных краін на мерапрыемствах і прадстаўлялі інавацыйныя праекты. У планах - замацаванне станоўчай дынамікі развіцця горада.
Другая тэма сесіі - праца прэзідыума гарсавета дэпутатаў па павышэнні ролі органаў мясцовага самакіравання ў вырашэнні пытанняў жыццезабеспячэння насельніцтва Бабруйска ў 2024 годзе. Вынікі першага года дзейнасці народных абраннікаў 29-га склікання падвяла старшыня гарсавета дэпутатаў Ірына Рынейская.
«Сам час ставіць сёння высокую планку. І мы павінны працаваць на вынік з максімальнай аддачай. Наша дзейнасць у першую чаргу накіравана на вырашэнне пытанняў развіцця Бабруйска. Дэпутацкі корпус павінен заставацца сучасным і мабільным, аператыўна і дзейсна рэагаваць на надзённыя патрэбы бабруйчан, павышаючы іх дабрабыт, узровень і якасць жыцця», – адзначыла Ірына Мікалаеўна (з падрабязнай справаздачай можна азнаёміцца на старонках газеты «Бабруйскае жыццё» ад 19 лютага). На сесіі старшыня нагадала аб прыярытэтных напрамках у рабоце і паставіла задачы на будучыню.
Пільная ўвага - добраўпарадкаванню горада, актывізацыі органаў самакіравання на месцах, рабоце з моладдзю і ветэранамі. У Год добраўпарадкавання важна актыўна далучаць і жыхароў нашага горада ў навядзенне чысціні і прыгажосці на вуліцах і ў дварах, каб людзі самі праяўлялі ініцыятывы ва акультурванні Бабруйска. Заўсёды актуальны (і асабліва ў год 80-годдзя Перамогі) прывядзенне ў парадак памятных мясцін – гэта таксама павінен быць агульны ўклад бабруйчан у захаванне нашай гісторыі.
Аб выкананні бюджэту горада за 2024 год дэпутатам расказаў начальнік фінансавага ўпраўлення гарвыканкама Руслан Іларыёнаў. У даход бюджэту паступіла больш за 535 млн. рублёў. Расходная частка па-ранейшаму застаецца сацыяльна арыентаванай: 81,1% усіх выдаткаў (больш за 432 млн рублёў) накіравана на сацыяльную сферу - ахова здароўя, адукацыя, спорт, культуру. Больш за 70 млн рублёў з бюджэту было выдзелена на галіны гарадской гаспадаркі, добраўпарадкаванне горада, капітальны рамонт жылфонду.
Сярод іншых пытанняў сесіі дэпутаты зацвердзілі змяненні па падатковых выплатах, права на прадастаўленне льгот, назначэнне стыпендый спартсменам, фінансаванне Інвестыцыйнай праграмы па будаўніцтве жылых дамоў сацыяльнага прызначэння.
Фота Аляксандра Анташкевіча, bobrlife.by