Переводчик
26 лістапада 2024 года ў ДУК «Палац мастацтваў г. Бабруйска» ў 11-ы раз адбыўся інклюзіўны кірмаш талентаў «Пад сузор'ем дабра» сумесна з УСА «Тэрытарыяльны цэнтр сацыяльнага абслугоўвання насельніцтва Першамайскага раёна г. Бабруйска», прымеркаваны да Міжнароднага дня інвалідаў i Дня інвалідаў Рэспублікі Беларусь. Гэта падзея, якая дэманструе сілу і важнасць інклюзіі - дапамагае людзям з інваліднасцю ўключыцца ў актыўнае грамадскае жыццё нараўне з іншымі. Рэалізацыя гэтага праекта дае магчымасць паказаць гледачам, што мастацтва не мае межаў і кожны таленавіты чалавек мае права выступаць на сцэне.
Мерапрыемства сабрала 10 устаноў і грамадскіх арганізацый горада і рэгіёна, якія наведваюць людзі з інваліднасцю, а таксама каманды аддзяленняў дзённага знаходжання для інвалідаў з Каменкі і Асіповічаў.
У фае 1-га паверха Палаца мастацтваў працаваў творчы салон людзей з абмежаванымі магчымасцямі. Разнастайнасць творчых работ, прадстаўленых удзельнікамі мерапрыемства, уражвала: карціны, сувеніры і свечкі ручной работы, драўляныя дошкі, фартухі і прыхваткі для кухні і многае іншае - і ўсё гэта выканана з такім талентам, акуратнасцю і падыходам, што складана адрозніць, дзе работы людзей з інваліднасцю, а дзе - не. Што ў чарговы раз пацвярджае - чалавек можа быць абмежаваны толькі сваім уяўленнем, а абмежаваныя магчымасці ніяк не абмяжоўваюць людзей у творчасці і самавыяўленні.
У той жа час на сцэне Палаца мастацтваў праходзіла інклюзіўная канцэртная праграма з удзелам людзей з інваліднасцю і творчых калектываў ДУК «Палац мастацтваў г. Бабруйска». Удзельнікі з інваліднасцю і творчыя калектывы горада выступалі нараўне, ствараючы душэўную атмасферу ў зале. Актыўная падтрымка гледачоў надавала артыстам натхнення, і абмен станоўчай энергіяй саграваў сэрцы ўсіх прысутных. Гэты канцэрт стаў не толькі спосабам адзначыць Міжнародны дзень інвалідаў, але і магчымасцю нагадаць усім нам аб сіле духу, стойкасці і неверагоднай энергіі людзей з інваліднасцю.
Інклюзіўны кірмаш талентаў «Пад сузор'ем дабра» - значнае для горада мерапрыемства, якое дапамагае ўключыцца людзям з інваліднасцю ў актыўнае грамадскае жыццё нараўне з іншымі, што і з'яўляецца сапраўднай інклюзіяй. І асабліва важна працягваць правядзенне кірмашу талентаў, паколькі гэта рэдкая магчымасць для людзей з абмежаванымі магчымасцямі адчуць сваю значнасць у нашым грамадстве, самасцвярдзіцца, заявіць аб сваіх поспехах.
Сваім меркаваннем і захапленнем аб мерапрыемстве падзялілася Алена Верасава, удзельніца танцавальнага калектыву Бабруйскай гарадской арганізацыі грамадскага аб'яднання «Беларускае таварыства інвалідаў»:
«Падзея перасягнула ўсе мае чаканні! Інклюзіўны кірмаш талентаў заўсёды збірае дзіўных людзей, якія дзеляцца сваімі гісторыямі і талентамі. Мяне заўсёды кранае тое, як усе падтрымліваюць адзін аднаго падчас выступу. Гэта не толькі кірмаш, але і платформа для стварэння сяброўства, разумення і творчасці. Я абавязкова буду чакаць наступнага года, каб падрыхтаваць і выступіць з новым творчым нумарам».
- Я наведала інклюзіўны кірмаш талентаў і засталася ў поўным захапленні! Атмасфера была неверагодна прыязнай і цёплай. Я ўбачыла мноства таленавітых людзей, якія дзяліліся сваімі захапленнямі і навыкамі. Мерапрыемства сапраўды паказала, як важна падтрымліваць і развіваць талент кожнага», - падзялілася ўражаннямі Алена Сячко, культарганізатар ДУ «Бабруйскі сацыяльны пансіянат «Каменка».
- Інклюзіўны кірмаш талентаў - гэта не проста штогадовая падзея, а цэлае свята, якога чакаюць і арганізатары, і ўдзельнікі. Я заўсёды радуюся разнастайнасцi выступаў і майстар-класаў, людзей з інваліднасцю, якія дэманструюць і раскрываюць свае дзіўныя таленты. Дзякуй арганізатарам за такую важную працу», - сказала старшыня Бабруйскай гарадской арганізацыі грамадскага аб'яднання «Беларускае таварыства інвалідаў».
Кацярына Быкава-Хаасма, метадыст метадычнага аддзела
ДУК «Палац мастацтваў г. Бабруйска»
Фота Кацярыны Салановіч
Па матэрыялах БЖ