Расказваем, што стане галоўнай тэмай адзінага дня інфармавання ў снежні

19 снежня ў працоўных калектывах Бабруйска пройдзе Адзіны дзень інфармавання. Галоўнай тэмай абмеркавання стане «Беларусь - краіна міру і згоды».

Нялёгкая гісторыя беларускай зямлі назаўжды запраграмавала народы, якія насяляюць яе, выключна на мірнае суіснаванне. Беларусы, рускія, яўрэі, палякі, татары і прадстаўнікі многіх іншых нацыянальнасцей заўсёды жылі ў міры і згодзе, дзялілі і радасць, і гора, ганарыліся сваімі поспехамі і дасягненнямі, пераадольвалі цяжкасці і нягоды. Ва ўмовах напружанай міжнароднай абстаноўкі, пагроз нашаму традыцыйнаму ўкладу жыцця мы зрабілі сур'ёзны крок на шляху ўмацавання суверэнітэту краіны. Зрабілі яго, абапіраючыся на ўласны вопыт канстытуцыйнага рэфармавання, беручы пад абарону спрадвечныя каштоўнасці, назапашаныя за шматвяковую гісторыю беларускага народа, які ў пераломныя моманты заўсёды рабіў выбар на карысць міру, стварэння і ўмацавання асноў нашай дзяржаўнасці.

Мабыць, адным з самых яскравых і відавочных сведчанняў такой згоды з'яўляюцца вынікі рэспубліканскага рэферэндуму 27 лютага 2022 г. па пытанні ўнясення змяненняў і дапаўненняў у Канстытуцыю Рэспублікі Беларусь. Пераважная большасць беларусаў (82,86%) аддала свае галасы за абноўленую мадэль дзяржаўнага развіцця, у якой вышэйшым прадстаўнічым органам народаўладдзя стаў Усебеларускі народны сход.

Рэспубліка Беларусь зацікаўлена ў раўнапраўных адносінах, ва ўзаемавыгадным супрацоўніцтве, у нарошчванні гандлёва-эканамічных сувязей і гуманітарных абменаў з усімі без выключэння краінамі. І ў першую чаргу, як зразумела і лагічна, - з бліжэйшымі суседзямі. Аднак пакуль працягваецца «гарачая» фаза канфлікту ва Украіне, цяжка разлічваць на пазітыўныя зрухі ў адносінах Беларусі з шэрагам краін, у тым ліку і нашых суседзяў на заходніх рубяжах. Але мы глядзім на перспектыву. Рана ці позна там возьме верх разуменне, што альтэрнатывы мірнаму суіснаванню ў рамках шматпалярнага свету няма і быць не можа.

Па матэрыялах БЖ