6 Снежань 2024

Вынікі правядзення маніторынгу кадравага забеспячэння ў арганізацыях Бабруйска за 9 месяцаў разгледзелі на пасяджэнні гарвыканкама.

Кадравы маніторынг праходзіць у 42 дзяржаўных арганізацыях горада па 98 найбольш запатрабаваных пасадах і працоўных прафесіях. Начальнік упраўлення арганізацыйна-кадравай работы гарвыканкама Жанна Бабкова адзначыла, што за студзень-верасень па пагадненню бакоў узгоднены і звольнены 8 работнікаў (для параўнання: за такі ж перыяд 2023-га - 31 работнік). За 9 месяцаў праведзены выязныя маніторынгі па выкананні ўстаноўленага парадку звальнення і кадравых перамяшчэнняў у 12 арганізацыях. Парушэнняў у іх не ўстаноўлена. Спікер звярнула ўвагу кіраўнікоў на неабходнасць актуалізаваць пералік прафесій, якія падлягаюць маніторынгу.

На пасяджэнні былі прааналізаваны прычыны звальненняў работнікаў і меры па кадравым забеспячэнні, якія прымаюцца. Як паведаміў начальнік упраўлення па працы, занятасці і сацыяльнай абароне гарвыканкама Сяргей Паўленка, на сённяшні дзень ў Бабруйску ёсць больш за 3100 вакансій. Найбольшую патрэбнасць у кадрах адчуваюць на «Белшыне», заводзе ТДіА, «ФанДАКу», заводзе БПД, у «Еўраопце» і «Дабраноме », установах аховы здароўя, дыстанцыі шляху, аўтобусным парку. Сярод самых запатрабаваных у нашым горадзе спецыяльнасцяў - слесар-рамонтнік, вадзіцель,  электраманцёр, зборшчык пакрышак, грузчык, прыбіральнік памяшканняў, урачы-спецыялісты, медсёстры, інжынеры. «У 2024-м, як і ў папярэднія гады, рынак працы арыентаваны на працоўныя прафесіі. Іх доля ў агульнай колькасці вакансій склала 70 працэнтаў», - праінфармаваў Сяргей Паўленка.

Адной з мер па стабілізацыі сітуацыі па занятасці ў доўгатэрміновай перспектыве назвалі заключэнне мэтавых дагавораў на навучанне спецыялістаў, якія прыйдуць на замацаваныя працоўныя месцы пасля атрымання дыплома.

Маргарыта Бушуева
Фота Аляксандра Анташкевіча

Па матэрыялах БЖ

Поделиться