Переводчик
Прэзідэнт Беларусі Аляксандр Лукашэнка напярэдадні свяшчэннай даты - 80-годдзя Перамогі ў Вялікай Айчыннай вайне - уручыў дзяржаўныя ўзнагароды заслужаным прадстаўнікам розных сфер.
"Дзякуючы беспрэцэдэнтнай мужнасці і адзінству савецкага народа завяршылася самая страшная, самая крывавая і маштабная вайна ў гісторыі чалавецтва. Завяршылася поўным разгромам фашызму. Для Беларусі гэта Вялікая Перамога і захаванне памяці аб ёй - частка нашай нацыянальнай ідэі. Акупіраваная, скатаваная ворагам, але непакораная рэспубліка-партызанка, рэспубліка-падпольшчыца заплаціла за сваё мірнае неба велізарную цану. Стаціўшы кожнага трэцяга", - сказаў кіраўнік дзяржавы.
Ён падкрэсліў, што подзвіг герояў назаўсёды застанецца найвялікшым прыкладам беззапаветнай любові да Радзімы, прыкладам, на якім выхоўваюць дзяцей, прадаўжаючы традыцыі, атрыманыя ў спадчыну ад доблеснага пакалення пераможцаў.
Многія айчынныя прамысловыя гіганты - "Беларуськалій", МТЗ, МАЗ, БЕЛАЗ - вядуць сваю гісторыю пачынаючы з пасляваеннага часу. "Гэту спадчыну мы не проста захавалі, але прымножылі і ператварылі ў вядомыя беларускія брэнды", - сказаў кіраўнік дзяржавы.
Сярод узнагароджаных ордэнамі і медалямі - прадстаўнікі сілавога блока. "Восем мірных дзесяцігоддзяў прайшло, а нас правяраюць на трываласць практычна штодзённа. І людзі ў пагонах пастаянна на баявым пасту, - адзначыў кіраўнік дзяржавы. - Аб вашых подзвігах публічна не гавораць часам. Але я хачу, каб усе ведалі: вы - героі. Дзякуй вам за службу".
У ліку ўдастоеных дзяржаўных узнагарод кіраўнікі рэгіёнаў і вядомых айчынных прадпрыемстваў, чыю прадукцыю ведаюць і любяць не толькі ў Беларусі, але і далёка за яе межамі.
У Палацы Незалежнасці таксама ўшаноўвалі аграрыяў - кіраўнікоў перадавых гаспадарак, якія ўжо цяпер паказваюць, як можна жыць і працаваць у вёсцы будучыні. "Ваш вопыт для нашай краіны вельмі карысны", - адзначыў Прэзідэнт.
"Вядома, будучыні няма без тых, хто працуе ў навуцы і адукацыі. Вы адказваеце не толькі за падрыхтоўку высакакласных спецыялістаў, але і за тое, каб адкрыцці і напрацоўкі як мага хутчэй укараняліся ў вытворчасць і прыносілі карысць нашай эканоміцы", - падкрэсліў кіраўнік дзяржавы.
Ён адзначыў, што мы ганарымся сучаснымі дасягненнямі, таму важна падзякаваць за захаванне традыцый доблесным ветэранам працы: "Вашы мудрыя парады, актыўная жыццёвая пазіцыя бясцэнныя і дапамагаюць вырашаць многія задачы".
Дзяржузнагарод удастоены і прадстаўнікі творчых прафесій. "Многаму нас навучыў і многае паказаў наш грандыёзны па задуме і выкананні праект "Марафон адзінства". За некалькі месяцаў арганізатары і ўдзельнікі праехалі ўсю краіну з вялікімі канцэртамі, тэматычнымі выставамі, дыялогавымі пляцоўкамі", - адзначыў Аляксандр Лукашэнка.
Прэзідэнт пажадаў, каб гэты дзень не стаў фінішным п'едэсталам, а ператварыўся для лаўрэатаў дзяржузнагарод і іх калектываў у кропку адліку на шляху да новых здзяйсненняў: "Не час сёння спачываць на лаўрах. Атрымліваючы ўзнагароды напярэдадні 80-годдзя Вялікай Перамогі, памятайце пра тых герояў, дзякуючы якім мы жывём".
Аляксандр Лукашэнка павіншаваў усіх з надыходзячым святам, пажадаў моцнага здароўя, шчасця і мірнага неба над галавой.
Ордэна Айчыны І ступені ўдастоены генеральны дырэктар ААТ "Савушкін прадукт" Аляксандр Саўчыц.
Ордэна Айчыны ІІІ ступені ўдастоены старшыня Мінскага гарвыканкама Уладзімір Кухараў.
Намеснік старшыні Следчага камітэта Анатоль Васільеў узнагароджаны ордэнам "За службу Радзіме" III ступені. Гэтай жа ўзнагароды ўдастоены замеснік дырэктара ДФР КДК Віктар Селіцкі, начальнік 21-га пагранатрада пагранічнай службы Сяргей Саўчук.
Ордэнам Пашаны ўзнагароджаны старшыня Віцебскай абласной арганізацыі Беларускага грамадскага аб'яднання ветэранаў Сяргей Альсевіч, генеральны дырэктар ААТ "Брэсцкі мясакамбінат" Павел Бухавецкі, дырэктар ААТ "Мажэліт" Вікенцій Ермалёнак, начальнік дзяржаўнай установы "Галоўнае ўпраўленне па абслугоўванні дыпламатычнага корпуса і афіцыйных дэлегацый "Дыпсэрвіс" Валерый Скакун, начальнік інспекцыі Міністэрства па падатках і зборах па Баранавічах Васіль Сухаверхі, дырэктар прадпрыемства "Гефест-тэхніка" Валянцін Фісюк, старшыня Брэсцкай абласной арганізацыі Беларускага грамадскага аб'яднання ветэранаў Вячаслаў Хафізаў, слесар па зборцы металаканструкцый Баранавіцкага станкабудаўнічага завода Віктар Ятчэня.
Старшыня Мінскага гарадскога армянскага культурна-асветнага таварыства "Аястан" Георгій Егіязаран удастоены ордэна Францыска Скарыны.
Медалём "За адзнаку ў ахове грамадскага парадку" ўзнагароджаны галоўны інспектар упраўлення ДФР КДК Павел Зелянкевіч.
Медаля "За адзнаку ў ахове дзяржаўнай граніцы" ўдастоены старшы інспектар аддзела правядзення аперацый мытнага кантролю Брэсцкай мытні Дзмітрый Валчковіч і старшы інспектар аддзела мытных аперацый і кантролю нумар 1 мытнага паста "Варшаўскі мост" Брэсцкай мытні Дар'я Савіч. Гэтай жа ўзнагародай адзначаны заслугі намесніка старшыні Дзяржаўнага пагранічнага камітэта (нядаўна ён завяршыў дзейнасць на гэтай пасадзе ў сувязі са звальненнем з ваеннай службы ў запас па дасягненні гранічнага ўзросту) Ігара Печані і начальніка ўпраўлення Дзяржпагранкамітэта Аляксандра Макарэвіча.
Дырэктар установы "Палац Рэспублікі" Максім Прыхадоўскі ўзнагароджаны медалём "За працоўныя заслугі".
Медалём Францыска Скарыны ўзнагароджаны дырэктар ТАА "Музычная медыякампанія" Андрэй Гузель і генеральны прадзюсар Ганна Лукашэнка.
Аўтару і выканаўцу песень, салістцы групы Aura Юліі Быкавай прысвоена ганаровае званне заслужанага артыста Беларусі. Гэтага ж ганаровага звання ўдастоены вядучы майстар сцэны Нацыянальнага акадэмічнага драматычнага тэатра імя Якуба Коласа Пётр Ламан, начальнік ансамбля - мастацкі кіраўнік заслужанага калектыву Рэспублікі Беларусь "Акадэмічны ансамбль песні і танца Узброеных Сіл Рэспублікі Беларусь" палкоўнік Дзмітрый Навумовіч, артыст-вакаліст (саліст) - вядучы майстар сцэны Магілёўскай абласной філармоніі Павел Усовіч.
Ганаровага звання заслужанага дзеяча культуры ўдастоены выкладчык па класе ўдарных інструментаў Брэсцкага дзяржаўнага музычнага каледжа імя Рыгора Шырмы Мікалай Нярэзька.
Звання заслужанага дзеяча навукі ўдастоены загадчык кафедры гісталогіі, цыталогіі і эмбрыялогіі Гродзенскага дзяржаўнага медыцынскага ўніверсітэта Сяргей Зіматкін.
Дырэктару Магілёўскага абласнога цэнтра фізічнага выхавання і спорту навучэнцаў і студэнтаў Аляксандру Шайтораву прысвоена ганаровае званне "Заслужаны работнік адукацыі Рэспублікі Беларусь".
Заслужаным работнікам прамысловасці стаў генеральны дырэктар РУВП "Граніт" Эдуард Гаўрылковіч.
Дырэктар ААТ "Шайцерава" Міхаіл Гумнянкоў і дырэктар ААТ "Парахонскае" Уладзімір Храленка ўдастоены ганаровага звання заслужанага работніка сельскай гаспадаркі.
Заслужаным пілотам стаў намеснік камандзіра авіяцыйнага атрада - начальнік аддзела трэніровак ААТ "Авіякампанія "Белавія" Уладзімір Кашавец.
