Переводчик
Незвычайна цікавыя і натхняльныя мерапрыемствы адбываліся ў нашым тэатры на працягу 80-га юбілейнага сезона. На некаторых з іх хочацца спыніцца сёння, у дзень яго ўрачыстага закрыцця. Па-першае, гэта пяць прэм’ер на любыя густ, узрост і досвед. «Ідылія», што адкрывала юбілейны сезон, парадавала традыцыйнасцю і лёгкасцю; «Грымёрка» з гумарам паказала жыццё за сцэнай; навагодні «Шчаўкунок» уразіў стылёвасцю не толькі дзяцей; «Верабей і Анёл» па-новаму раскрыў талент артыстаў; «Аладзін» акунуў у шыкоўную ўсходнюю казку. Усе ахвотныя разам з намі адзначылі юбілей канцэртам «80 цудоўных гадоў».
На чарзе яшчэ адна прэм’ера, але гэта будзе ўжо ў наступным сезоне. А зараз трэба ўзгадаць падзею рэспубліканскага ўзроўню – ІХ Рэспубліканскі фестываль нацыянальнай драматургіі імя В.І. Дуніна-Марцінкевіча, што адбыўся напрыканцы 2024 года і даў магчымасць жыхарам і гасцям Бабруйска ўбачыць лепшыя спектаклі беларускіх тэатраў па творах нашых аўтараў.
Канешне, узгадаем наш плённы ўдзел у міжнародных фестывалях, сярод якіх XVIII Міжнародны маладзёжны тэатральны форум «М.@rt.кантакт-2025», Адкрыты міжнародны тэатральны фестываль імя Паўла Луспекаева «Спадарыня Удача», XXVI Міжнародны фестываль «Славянскія тэатральныя сустрэчы». Усе пералічаныя фестывалі прынеслі ў нашу скарбонку пэўныя перамогі. Наперадзе яшчэ адзін фестываль – ХХІХ Міжнародны тэатральны фестываль «Белая вежа». Зычым атрымаць самыя высокія ўзнагароды!
Наша гастрольная дзейнасць, як заўсёды, была насычанай: толькі абменныя гастролі з тэатрамі Мінска, Гомеля, Магілёва, Бранска ўзаемна падарылі магчымасць гледачам атрымаць асалоду ад таленту гасцей.
Навінкай гэтага сезона з’явіліся тэматычныя экскурсіі: «Тэатральнае закуліссе», «Дзень роднай мовы», «Жанчына ў тэатры», «Тэма Вялікай Айчыннай вайны ў тэатры», квэст-гульня «Тэатральная вандроўка». Пра папулярнасць такога віду дзейнасці сведчаць 35 праведзеных экскурсій толькі ў чэрвені! З задавальненнем гледачы рознага ўзросту шпацыруюць па прасторах будынка, слухаюць аповеды пра гісторыю і сучаснасць тэатра, пра таямнічы працэс пастаноўкі спектакля, назіраюць за момантамі вытворчасці рэквізіту, дэкарацый, касцюмаў, з хваляваннем крадуцца па цёмнай глядзельнай зале на сцэну і за кулісы, з цікаўнасцю падглядаюць за рэпетыцыямі. Натхняльныя водгукі гасцей пасля такіх мерапрыемстваў акрыляюць на яшчэ больш плённую працу дзеля вашых эмоцый.
Яшчэ адна навінка юбілейнага сезона – майстар-класы па танцах ад клуба гісторыка-бытавых танцаў «Сябрына», што адбываліся і як частка мерапрыемства, і як самастойныя імпрэзы. Танцавальнай кульмінацыяй з’явіўся Стрэчаньскі баль, што адбыўся ў лютым пры супрацоўніцтве з Беларускай прафесійнай танцавальнай лігай. Каб пакружыцца на тэатральным паркеце, з’ехалася 50 пар з усёй Беларусі! Усе навінкі і актыўнасці не маглі б ажыццявіцца без падтрымкі кіраўніцтва тэатра – словы ўдзячнасці ад зацікаўленых гледачоў з розных куткоў Беларусі і не толькі гучаць пастаянна!
Робім выснову: такі паважаны ўзрост тэатра абавязвае адпавядаць і развівацца далей, шукаць новыя формы працы, новыя фарматы і жанры спектакляў і ўзаемадзеяння з гледачамі. А вы, шаноўнае спадарства, адкажаце ўзаемнасцю на нашы прапановы! Мы гэта ведаем, таму што працуем для Вас!
Таццяна Мурманцава
Фота Алы Сказавай
По материалам БЖ