«Тэатр – гэта маё жыццё». Аляксандр Парфяновiч рыхтуецца да юбiлею

Юбілейны, 80-ы, тэатральны сезон багаты на круглыя даты. Так, 21 жніўня 75-гадовы юбілей адзначыць заслужаны артыст Рэспублікі Беларусь, Ганаровы грамадзянін Бабруйска, уладальнік прыза «Крыштальная зорка» і прэміі «Крыштальная Паўлінка», шматлікіх грамат і падзяк, сярод якіх Ганаровая грамата Савета Міністраў Рэспублікі Беларусь і Падзяка Старшыні Палаты прадстаўнікоў Нацыянальнага сходу Рэспублікі Беларусь. Пэўна, вы зразумелі, што размова ідзе пра Аляксандра Аляксандравiча Парфяновiча – унiкальнага артыста, якi стаў знакавым не толькі для бабруйскага тэатра, але і для ўсяго беларускага тэатральнага мастацтва. У гэтым жа жніўні Аляксандр Аляксандравiч адзначыць 50-годдзе бесперапыннага служэння ў нашым тэатры!

З народзінамі загадзя не віншуюць, але ж узгадваць і ганарыцца, казаць прыемныя словы і заслужана ўшаноўваць чалавека і прафесіянала можна заўсёды. За 50 гадоў творчай працы Аляксандр Аляксандравіч стварыў больш за 150 роляў рознага плану. Гэта толькі ў тэатры. А наш юбіляр вядомы ж яшчэ і як кінаакцёр! Яго фільмаграфія налічвае больш за 80 работ! Нават калі мы вельмі пастараемся, не атрымаецца ў кароткай нататцы пералі­чыць усё, што стварыў Аляксандр Аляксандравіч на сцэне і на здымачнай пляцоўцы.

Ці трэба казаць, што Аляксандр Аляксандравіч – самы пазнаваемы і любiмы бабруйскімі гледачамi артыст? Папулярнасць, творчы і чалавечы аўтарытэт, любоў, давер i поспех – нязменныя спадарожнiкi артыста. Яго творчасць з’яўляецца сапраўдным натхненнем для многіх пакаленняў, а здольнасць ўвасабляць самых розных персанажаў, ад драматычных да камедыйных, робіць яго адным з самых запатрабаваных артыстаў. Не раз у інтэрв’ю Аляксандр Аляксандравіч казаў: «Тэатр – гэта ўсё маё жыццё. Прызначэнне гэтага вялікага мастацтва, а значыць, і маё – звяртацца да сэрца гледача, абуджаць у ім добрае і вечнае».

У гонар юбілею Аляксандра Аляксандравіча калектыў тэатра рыхтуе асаблівы канцэрт, у праграме якога мусяць быць і музычныя нумары, і ўспаміны, і цікавыя гісторыі з жыцця артыста, і выступленні яго калег і сяброў, і шчырыя віншаванні. Пільна сачыце за нашым рэпертуарам і не прапусціце магчымасць стаць часткай незабыўнага свята, выказаць свае шчырыя віншаванні і пада­рыць кветкі, разам ушанаваць заслужанага артыста Рэспублікі Беларусь з нагоды юбілею!

Таццяна Мурманцава
Фота Алы Сказавай